Un acollemento familiar é algo que cambia a vida de moitas persoas. En primeiro lugar, temos a nena, neno ou adolescente que deixa de vivir nun centro residencial. Pero, aínda que a familia de acollida non cambia de domicilio, tamén cambia o seu día a día. Trátase dunha experiencia que supón numerosos retos, pero que as familias acolledoras tamén din que é enormemente gratificadora e enriquecedora.

As nenas, nenos e adolescentes que chegan a unha familia de acollida viviron situacións moi difíciles. En moitos casos sufriron neglixencia grave, malos tratos e mesmo abusos sexuais. Tras ser separados das súas familias de orixe, foron atendidos en recursos residenciais onde se lles tratou con respecto, profesionalidade, proximidade e agarimo. Con todo, estas contornas, pola súa propia natureza, non poden ofrecer a proximidade, intimidade e vínculo afectivo que proporciona unha familia que lles coida 24 horas ao día.

O acollemento familiar permítelles vivir nunha contorna segura, estable e afectuosa. Esta experiencia non só mellora o seu benestar emocional e cotián, senón que tamén lles ofrece unha perspectiva de futuro máis esperanzadora. Saber que poden contar con persoas adultas que os coidan, os acompañan e os apoian máis aló dos 18 anos marca unha diferenza fundamental. Non se trata só de evitar unha emancipación prematura ou o regreso a unha contorna familiar que non cambiou, senón de construír unha rede de apoio real e duradeira.

Para a familia que acolle, o cambio tamén é profundo. A dinámica diaria modifícase, xorden novos retos e apréndese a convivir con historias complexas. Non todo é fácil, e é importante recoñecelo. Pero tamén hai espazo para o crecemento, a empatía e a aprendizaxe mutua. O acollemento familiar non é unha solución máxica, nin unha experiencia idealizada. É unha medida de protección que, cando se realiza con compromiso e acompañamento, pode cambiar vidas.

O acollemento familiar cambia a vida da nena ou neno que é acollido, ao ofrecerlle unha oportunidade de reconstruír a súa historia nunha contorna segura. E cambia a vida de quen acolle, que descobre novas formas de vincularse, coidar e acompañar.

O programa de acollemento En familia busca fogares que permitan ás nenas e nenos sentirse queridas, vistas e escoitadas.

Máis información sobre a campaña na web “Isto é un fogar”.